話說琴日腦細捉住我係到寫春秋大道理去 "教訓" 客人, 搞到我一肚氣, 約人遲到不但止, 仲影響埋自己心情. 搞到琴晚食晚冇乜心機同舊同事聚舊. 不過呢個都唔係重點, 我擔心既係, 琴晚出個封email 去得太盡會得罪客人. 今朝一返到公司, 不出所料, 收到客人email 回覆, 行裡間見到佢嬲到不得了. 其實我已經唔想再理呢場鬧劇.不過我估我腦細唔會就咁擺休, 一定會死咬住客人唔放. 我真係冇見過有人做生意做到咁樣囉...大開眼界...
不過朝早我都唔得閒理咁多, 同事做到下星期二就走人, 我地忙住hand over 佢手上既客戶, 平時冇野做個陣時間就好似好慢咁, 但有正經理做就一野又到食lunch, 本來話今日想去食Jollibee, 但離遠已見到餐廳條隊長到乜咁, 已經知唔使諗. 唯有行 Plan B 去食茶仔.
今日心情依然唔係好好, 所以就是鳩爛旦叫個最平既set lunch 算數, 就係咁我叫左個焗醬意粉再加杯咖啡就算. 一路食飯既時候,我經理問我琴日個封email 做乜鳩野, 我咪話腦細發癲囉, 我寫乜講乜都話唔係咁呀, 係公司入面, 人地講乜你都可以話唔係呀, 因為你大晒架啦, 我都唔撚想彩佢. 佢想點就點. 一句講晒, 你要去到咁盡,日後出事唔好入我數就得啦.
今日臨收工之前, 細腦果然問我諗住點覆個客, 我都好唔爽咁彈佢一句, 我都得罪左個客啦, 仲覆? 火上加油咩? 之後佢叫我唔使怕喎, 對住啲蛋散唔使客氣...啊...閣下何嘗唔係另一個style 既蛋散? 不過你話唔使驚, 咁我咪照去囉, 只係感覺,我呢鑊洗濕左個頭, 無論如何都要頂硬上. 係好係壞, 實屬未知數, 我只好自求多福.
另一邊箱, 今日係我老婆係長沙最後一日training, 佢晚上就會坐高鐵返深圳, 所以今日佢好趕咁上埋最後一日既課堂, 不過佢都不忙係lunch hour 食好野, 居然晒個咁鬼正既叉燒炒飯向我耀武揚威. 好, 今日就比你得瑟一下, 得我心情好返個陣再收拾你.
