ကျွန်တော်နှင့်ဂွဈေး ( အပိုင်း-၄ ) ( Henry Aung )

in HIVE-MYANMAR3 years ago

111.jpeg

မင်္ဂလာပါ။ ကျွန်တော်နှင့်အတူ ဂွဈေးသို့ တခေါက်ပြန်သွားကြပါအုံးစို့။ ကျွန်တော့အနေဖြင့် ယမန်နေ့က ဖေါ်ပြပေးခဲ့ပြီး ဖြစ်သည့် အတိုင်း အသီးအရွက်များ ရောင်းသော ဆိုင်ခန်း များသို့ ရောက်နေခဲ့ပြီ ဖြစ်၏။ အသီးအရွက် သည်တို့ကာ တမျှော်တခေါ်။

အချို့ကလည်း အရွက်ပေါင်းစုံအား ဗန်းထဲထည့်ကာ လမ်းပေါ်တွင် ထိုင်ရောင်း နေကြ၏။ တနေရာတွင်ကာ အတို့အမြုပ်များရောင်းသော ဆိုင်အားတွေ့ရ၏။ ငပိရည် များ ( ဖျော်ပြီးသား ) အား ရေပုံးကြီးများဖြင့်ထည့်ကာ ရောင်းနေ၏။ ငပိရည်နှင့် တို့စားသော အရွက်တို့ကာ များလှပါဘိတောင်း။

ဘာအရွက်မှန်းပင်မသိ။ ကနဖေါ့လည်းပါ၏။ သင်္ဘော ရွက်နုများလည်း ပါ၏။ ခရမ်းကျွတ်သီးလည်း တွေ့ရ၏။ ချဉ်ဖတ်တို့ကာ ဇလားကြီးများဖြင့် ထည့်ထား၏။ ပဲတီချဉ် ၊ ကဒက်ချဉ် ၊ ငှက်ပျောဖူးချဉ် အခြား ကျွန်တော်မသိသော အရွက်ပေါင်းစုံ ချဉ်ဖတ်များလည်း တွေ့ရ၏။

လူအများ ဝယ်နေကြသည်က ဒညင်းဝက် ခေါ် ချဉ်ရည် စိမ်ထားသော ဒညင်းသီး ဖြစ်၏။ ငယ်ငယ်က အိမ်တွင် ဒညင်းသီး ပင်ရှိသောကြောင့် ဒညင်းသီးအား ပြုတ်စားဖူးပါ၏။ အစားမတော်လျင် ဆီးအောင့် ဆီးပိတ် ဖြစ်သောကြောင့် သတိထားရ၏။

ဒညင်သီးကာ စားလို့တော့ ကောင်းပါ၏။ သို့သော် အိမ်သာတက်လျင်ကာ အနံ့မခံနိုင်။ ဒညင်းသီး အုန်းနို့စမ်း ဆိုသည်လည်း ကြားဘူး၏။ ဘေးတွင်ကာ အသီးအနှံများ ရောင်းသော ဆိုင်ရှိ၏။ သရက်သီးရာသီ ဖြစ်သော ကြောင့် သရက်သီး မျိုးစုံတွေ့ရ၏။

စိန်တလုံး ၊ ရင်ကွဲ ၊ မချစ်စု ။ ထူးထူးဆန်းဆန်း ပန်းဆီရောင်သမ်းနေသော သရက်သီးကြီးအား မေးကြည့်သော အခါ ပတ္တမြား ငမောက် သရက်သီး ဖြစ်ကြောင်း သိရ၏။ ဒူးရင်းသီး များလည်း ပါ၏။ ဒူးရင်း သီးအနံ့ ကာ ကြိုက်သူတို့ အတွက် မွှေးလှသော်လည်း မကြိုက်သူတို့အတွက်ကာ အော့အန် သည်အထိ ဖြစ်ရ၏။

စင်္ကပူ ရှိ ကား ၊ ရထားတို့တွင် ဒူးရင်းသီး ယူဆောင်ခွင့်မရှိ။ မိလျင် ဒါဏ်ငွေ ရိုက်ခံရမည် ဖြစ်၏။ လိုင်ချီးသီးများ တွေ့ရ၍ ဈေးမေးကြည့်သော် အလေးချိန်နှင့်ရောင်းကြောင်း သိရ၏။ မြစ်ကြီးနား လိုင်ချီးသီး ဖြစ်ကြောင်းလည်း သိရ၏။ မြစ်ကြီးနား ဘယ်အရပ်ကလဲ ဟု လျှာရှည်၍ မေးမိသော် ဈေးရောင်းသူက " မြစ်ကြီးနား မြို့လယ်ကောင်တည့်တည့်မှာပေါက်တဲ့ အပင်ကနေ ကျွန်မကိုယ်တိုင် ခူးလာတာ" ဟု ဘုတော၏။

ထို အသီးအနှံများ ကြည့်နေချိန်တွင် စကော အတွင်း စုံစီနဖာ များထည့်၍ အော်ရောင်းနေသော လမ်းလျှောက်ဈေးသည် ဦးလေးကြီးတယောက်ကို တွေ့ရ၏။ သူဈေးအော်ရောင်းနေသည်အား နားထောင်ကြည့်ပါအုံး။ " ပရုတ်လုံးတွေရမယ် ပရုတ်လုံး တွေရမယ် ။ ဂျာမနီ ပရုတ်လုံး တွေ ၊ ဂျာမနီ မကြီးတွေကိုယ်တိုင်လုံးထားတာ" ဟူလို။

မိမိ မျက်လုံးတွင်ကာ ဂျာမနီသူ များ လောက်စာလုံး လုံးသကဲ့သို့ ပရုပ်လုံးများ ထိုင်လုံးနေသည်ကို မြင်ယောင်လာမိ၏။ ဈေးသည် တို့၏ ဈေးရောင်းနည်းကာ မျိုးစုံလင်လှ၏။ နောက်တနေရာတွင်လည်း အရွက်စုံလင်စွာ ရောင်းသော ကုန်စိမ်းသည်အား တွေ့ရ၏။

ထိုဆိုင်တွင်ကာ ပဒဲကော များရောင်းနေသည်ကို တွေ့မိ၏။ ဤပဒဲကော ကာ တုံယမ် ဟင်းချက်ရာတွင် မပါမဖြစ် ဖြစ်၏။ တုံယမ် ဟင်းချိုချက်နည်းကာ အလွန်လွယ်၏။ ငါးကြင်းခေါင်း အား ထက်ခြမ်းခွဲကာ ဆနွင်း ၊ ရှာလကာရည် ထည့်ကာ နယ်ဖတ်ပြီး ၁၅ မိနှစ်ခန့် အညှီသတ်ထားရ၏။

ထို့နောက် အိုးထဲတွင် ရေ အတန်အသင့်ထည့်ကာ ရေနွေးဆူသည်အထိ တည်ထားရ၏။ ရေနွေးဆူလျင် ကြက်သွန်နီ လေးစိပ် ခွဲထည့် ၊ ဂျင်း ပါးပါးလှီးထည့် ၊ ပဒဲကော ပါးပါးလှီးထည့် ၊ စပါးလင်ပင်အား ဓားပြားဖြင့်ရိုက်ကာ ထည့် ၊ ထို့နောက် ငရုတ်သီး ခြောက်ထည့် ( အစိမ်းထည့်လည်းရသည်) ထို့ နောက် အသင့်စား တုံယမ် အနှစ် ဖေါက်ထည့် ၊ ထန်းလျက်ခဲ တလုံးထည့် ၊ ဆားမထည့်ရ ဆားအစား ငံပြာရည် အနည်းငယ်ထည့်၍ အိုးအဖုံးပိတ်ထားလိုက်ပါ။

အဆာပလာများထည့်၍ နောက်တခါ ရေနွေးဆူလာလျင် နှပ်ထားသော ငါးခေါင်းအား ရေဖြင့် စင်ကြယ်စွာ ဆေး၍ ဟင်းအိုး အတွင်သို့ထည့်ရ၏။ ထို့နောက် ငါးနူးလာသည် အထိ ချက်ပြီးသော် ခရမ်းချဉ်သီး လေးစိတ်ခွဲထည့် ၊ ရှောက်ရွက် အလော်တော် နှင့် ရှားနံနံ ထည့်ရ၏။ ထို့နောက် ရှောက်သီး တခြမ်း ညှစ်ထည့် ။

နောက်ထပ် ၅ မိနစ်ခန့် ချက်ပြီးသော် အလွန်မွှေး၍ အနံ့အရသာ ရှိသော ငါးခေါင်း တုံယမ် ဟင်းချိုသုံးဆောင်နိုင်ပြီဖြစ်၏။ ဤ တုံယမ် ဟင်းချိုအား ငါး ၊ ပုဇွန် ၊ ကြက်သား မိမိ ကြိုက်ရာ သားငါးဖြင့် ချက်စားနိုင်၏။ ဝက်သားဖြင့် မချက်ရ ။ ဝက်သားတုံယမ်ဟင်းချက်စားလျင် ဝမ်းလျှောတတ် သောကြောင့် ဖြစ်၏။

ဆက်လက်ဖေါ်ပြပေးပါမည်။

Henry Aung ( Kachin )

03/06/2021 - Thursday - 08;45 Am

Sort:  

ချက်စားမယ် ငါးခေါင်ဆို ကြိုက်သပ
ကိုယ်တွေက ငါးခေါင်း မျှစ်ချဉ်ချက်၊ ငါးခေါင်းမုန့်ညှင်းနဲ့ မန်ကျီးမှည့်
ချဉ်ရည်ဟင်းသာ ချက်စားဖူးတာ။

ချက်စားကြည့်လိုက်.... လွှတ်ကောင်း

ကိုဟင့် စာ ဖတ်မှပဲ မစားဖူးတာတွေ များနေပြီ။
ဒညင်းသီး အုန်းနို့ဆမ်း နဲ့ သွေးတိုးသမားနဲ့ တွေ့လို့ကတော့ ...

သွေးတိုးသမားတွေကလည်း အဲသလို အစာတွေပဲကြိုက်ကြတာ။ မတည့်ပါဘူး ဆို စားချင်ပြီ။

Points Boosting refund to @kachinhenry! 🤓
Due to one of these reasons:
1. Post is not published via Ecency.
2. Post is already curated by our team.
3. Post is not curated by our curators within 24 hours.
4. Post might be too old post, try more recent content.
5. Author already received vote in last few hours, try again later.
Install Android: https://android.ecency.com, iOS: https://ios.ecency.com mobile app or desktop app for Windows, Mac, Linux: https://desktop.ecency.com
Learn more: https://ecency.com
Join our discord: https://discord.me/ecency