کھال کو اسپیکر اور مائیک میں بدلنے والی حیرت انگیز ایجاد

بین الاقوامی ماہرین اور انجینئروں کی ٹیم نے جسم پر پہنی جانے والی ایک ایسی ٹیکنالوجی وضع کی ہے جو آپ کی جلد کو اسپیکر اور مائیک میں بدل سکتی ہے۔

جنوبی کوریا کے السن نیشنل انسٹی ٹیوٹ برائے سائنس اینڈ ٹیکنالوجی (یواین آئی ایس ٹی) کے پروفیسر ہیون ہیوب کو اور دیگر ماہرین نے سننے اور بولنے سے معذور افراد کے لیے یہ ٹیکنالوجی وضع کی ہے۔ تاہم اسے معمولی رد و بدل کے ساتھ ’’اشیا کے انٹرنیٹ‘‘ (انٹرنیٹ آف تھنگز یا ’’آئی او ٹی‘‘) اور طبی آلات میں بھی استعمال کیا جاسکتا ہے۔

ماہرین نے انتہائی باریک، شفاف اور موصل نینو پرت تیار کی جو چاندی کے ایسے نینوتاروں سے بنی ہے جسے 90 درجے کے زاویئے پر چٹائی کی طرح بنا گیا تھا۔ اس کے بعد انہیں کسی بھی جگہ لگا کر اسپیکر میں بدلا جاسکتا ہے۔ اسی طرز پر ایک اور آلہ بنایا گیا ہے جو مائیکروفون کا کام کرتا ہے۔

اس پرت کی موٹائی بھی بہت ہی کم ہے جو ایک میٹر کے چند اربویں حصے کے برابر ہے جسے چپکانے کے لیے پولیمر پر رکھا گیا ہے۔ ہلکی پھلکی اسٹیکر نما اس پرت کو کسی بھی جگہ لگایا جاسکتا ہے۔ یہ آواز کی لہروں کو باقاعدہ اور قابلِ فہم ’’صدا‘‘ میں تبدیل کرتی ہے۔ اسے تبدیل کرکے آواز کے ان پٹ اور آؤٹ پٹ آلات میں بھی ڈھالا جاسکتا ہے۔

اس ٹیکنالوجی کو آگے بڑھاتے ہوئے ماہرین نے دوسرے مرحلے میں جلد سے چپکنے والے لاؤڈ اسپیکر اور مائیکروفون تیار کیے جو باریک ہونے کے باوجود آواز کے سگنل خارج کرسکتے تھے اور اسپیکر کی موٹائی صرف 100 نینومیٹر تھی۔ اگلے مرحلے میں اس ٹیکنالوجی کو تجارتی پیمانے پر بنانے کی کوشش کی جائے گی۔

Source:
https://www.express.pk/story/1343575/508/